Drejtori i të ashtuquajturës zyrë për Kosovën në qeverinë e Serbisë, Petar Petkoviq, e ka cilësuar si kërcënim të hapur ndaj sigurisë së serbëve në Kosovë vendosjen e stendave me emblemën e UÇK-së në hyrje të Graçanicës.

Ai tha se shoqëria në Kosovë po lëviz në drejtim të radikalizimit të rrezikshëm para syve të bashkësisë ndërkombëtare, transmeton Gazeta Express.

“Stendat me emblemën e UÇK-së janë një thirrje e hapur për dhunë dhe punën e njerëzve që janë krenarë për krimet e tyre, dhe kjo është arsyeja pse unë pres që përfaqësuesit e bashkësisë ndërkombëtare në Kosovë dhe Metohi të reagojnë urgjentisht dhe të marrin masa për ta eleminuar këtë”, tha Petkoviq.

Sipas Petkoviqit, një situatë e tillë kërkon alarm dhe kujdes, sepse këto veprime mund të shndërrohen në kërcënime serioze për sigurinë.

“Sidoqoftë, kjo është një situatë që kërkon alarm dhe kujdes, sepse kërcënimet verbale në Kosovë dhe Metohi, siç na ka mësuar përvoja, shumë lehtë shndërrohen në kërcënime më serioze të sigurisë,” tha Petkoviq